安全套就成日用，安全套嘅冷知識你又知唔知？

choicehealth

拿即係咁，我哋就成日同大家宣傳健康訊息，叫大家進行口交，陰道交或肛交嘅時候都要全程正確使用安全套，因為可以有效預防愛滋病同埋其他性病丫嘛！但係大家又有冇聽過有關安全套嘅冷知識呢？今日就同大家分享下啦！

安全套 (Condom) 呢個名到而家都無人知點解叫Condom!
Condom呢個字，有人話係源於英國國王查理二世服務的孔東醫生(Dr. Condom)有關，但其實於查理二世登基100多年前，已經有人使用類似安全套嘅物體。亦有人提出唔少拉丁詞語嘅詞源，例如 「condon」(容器)、「condamina」(房子)、cumdum(劍鞘或劍套)等，但真正詞源仍然無從得知。

安全套都有幾種唔同材料做成！
平時大家用慣嘅安全套，通常都係由乳膠製造，因為佢彈性非常好，拉扯強度都非常出色，甚至可以拉長800%而唔斷裂！一個安全套唔安全嘅話真係可以搞出人命㗎嘛！所以市面上大部分嘅安全套都係由乳膠製成嘅。不過乳膠有個缺點，就係會引起部份人過敏，而且亦唔可以用油性潤滑劑，否則有可能令乳膠安全套破裂！

因為以上缺點，有人就發明聚氨酯(PU)製造安全套，呢隻物料過敏性比乳膠低，擁有較佳嘅傳熱性、保質期亦較長、而且可以同油性潤滑劑一併使用、同埋無一般乳膠安全套嘅異味。不過佢彈性無乳膠咁好，而且比起乳膠安全套，PU安全套更容易滑落、破裂，價格亦都比較昂貴。

如果你崇尚天然，仲有以羊腸衣製成嘅安全套，真係夠晒原始呀！不過，羊腸衣表面存有好多細小嘅天然孔隙，對性病及愛滋病病毒嘅預防效用可能比其他安全套低！

安全套仲有其他用途？
咁安全套又防水，又難整穿，拉扯幅度又大，可以話係多用途容器呀！第二次世界大戰個陣，有士兵會用安全套去封住步槍槍口，防止污垢積聚。要將電子器材防水嘅話，都有人試過將安全套當防水袋咁用！

講咗幾樣安全套嘅冷知識，其實講咁耐，都係想叫咁多位ching用安全套姐！性交嘅時候全程正確使用安全套係預防性病嘅最好方法！無論口交，陰道交或肛交都要使用安全套，以減低患病風險。而且，一旦染上性病，患上其他性病，甚至愛滋病嘅風險都會提高！所以為咗自己身體著想，出去玩之前記得要有一「套」傍身呀！一旦懷疑自己有染上性病嘅風險，就記得睇醫生喇！定期身體檢查都好重要架！我哋再思提供免費嘅愛滋病同梅毒測試，20分鐘就知道結果！定時知道自己愛滋病或梅毒感染狀況先可以確保自己同你伴侶嘅身體健康。快啲預約做測試啦！

【再思社區健康組織】(NGO)
性健康諮詢;
免費、不記名、保密、
愛滋病毒/梅毒快速測試
電話: 3188 9024
手機: 6424 8126
地址: 再思新地址旺角弼街9-15號恆利中心302室

w00999

多謝資訊提供