常見性病系列：性器官疣(椰菜花)

choicehealth

各位師兄如果無偏食嘅話就一定有食過椰菜花架啦！椰菜花有豐富維他命，又低卡路里，而且高纖維，仲可以抗癌添！椰菜花我哋就一定建議大家食多啲，但係，另一種「椰菜花」就令人『聞花色變』喇！冇錯，我哋就係講緊性病嘅「椰菜花」！

所謂「椰菜花」，係性器官疣嘅俗稱，因為患者會於性器官或肛門，甚至口腔附近長出一粒粒外表類似「椰菜花」嘅疣，所以就有呢個別稱。性器官疣係由HPV病毒引起，主要係HPV 6型及11型引起。性器官疣嘅傳播能力非常強，如果有同患者進行過性接觸，就好大機會會感染到HPV病毒，而且大部份人會喺8個月內有病徵，生出「椰菜花」狀嘅疣。雖然佢對生命並無太大威脅，但係椰菜花絕對會影響你同你伴侶嘅性健康！

最慘嘅係咩呀？醫學界係暫時未搵到完全根治椰菜花嘅治療方法架！現今治療椰菜花嘅方法主要係用藥膏，激光或者冷凍方法去移除患者身上嘅性器官疣，而且係會有復發嘅機會。患者要靠自身免疫力，以及平時健康嘅生活習慣去抑制性器官疣嘅增生，所以手尾係好長架！

咁有啲咩方法可以預防呢？當然，正確使用安全套係其中一個方法，口交，陰道交及肛交全程使用安全套係可以預防多種性病嘅！除咗使用安全套，接種HPV預防針都係一個極有效嘅預防方法，除咗預防會引致椰菜花嘅HPV 6及11型之外，仲可以預防引致癌症嘅HPV病毒，包括肛門癌，口腔癌以及子宮頸癌等，所以接種疫苗除咗保護自己之外，都係保護你嘅伴侶健康。

所以話，各位師兄除左要玩得開心之外，都要玩得安全！雖然椰菜花通常係有病徵可以睇，但係其他性病例如愛滋病或者梅毒，係可以無病徵架！所以大家記住玩之餘都要定期上嚟做快速測試呀！

【再思社區健康組織】(NGO)
性健康諮詢;
免費、不記名、保密、
愛滋病毒/梅毒快速測試
電話: 3188 9024
手機: 6424 8126
地址: 再思新地址旺角弼街9-15號恆利中心302室

superadmin

瀏覽更多【再思社區健康組織】最新性知識及各類健康資訊報告
https://winning11.com/forum/dz/forum.php?mod=forumdisplay&fid=9&filter=typeid&typeid=658